Шеснаесет годишниот А.П. бил одличен ученик, друштвен и вклучен во наставата и воншколските активности. Но, во изминатите неколку месеци неговото однесување се промени – ретко се дружи, на големиот одмор се изолира, изостанува од часови, често им противречи на наставниците, брзо избувнува. Неговите објави на социјалните мрежи станаа нагласено агресивни, а споделува и содржини од групи со екстремни идеологии.
Ова се само дел од знаците кои наставниците, психолозите и педагозите во училиштата треба да умеат да ги препознаат кај нивните ученици како ризично однесување кое би можело да води кон радикализација и насилен екстремизам.
Со примери извлечени од праксата, како и серија интерактивни вежби и симулации, 33 претставници од средните училишта од Гостивар, Штип и Куманово на денешната работилница организирана од Центарот за истражување и креирање политики (ЦИКП), ги совладуваа техниките за навремено препознавање на клучните индикатори на радикализација.
Оваа еднодневна работилница, на учесниците им овозможи увид во процесите кои водат до радикализација, можност да ги истражат различните фактори на влијание, но и подобро подобро да ја разберат својата специфична улога и различните предизвици со кои се соочуваат наставниците, педагозите и училишните психолози.
Дел од практичните вежби се фокусираа на развојот на вештини за водење сензитивни разговори со учениците, техники за активно слушање и градење доверба, ослободување од личните предрасуди, како и зајакнување на стратегиите за рана интервенција и превенирање на ескалација на ситуацијата.
Учесниците, исто така, се запознаа и со механизмите за упатување и протоколите за пријавување на случаи на радикално или екстремно насилно однесување до надлежните институции.
Понудените практични алатки и стратегии ќе им помогнат на учесниците успешно да се справат со потенцијалните проблеми во нивните училишта, но и да им помогнат на учениците да се изборат со предизвиците со кои се соочуваат.
Оваа активност е организирана во рамките на проектот Guardian Shield – стратешка иницијатива дизајнирана за јакнење на отпорноста на заедниците против радикализација и насилен екстремизам во Македонија, поддржан од Меѓународниот центар за извонредност во спречување екстремизам и радикализација – Hedayah, и финансиран од Европската Унија.
Teachers Trained to Recognize Early Signs of Radicalisation Among Students
A 16-year-old student, once social and engaged, begins isolating himself, skipping classes, showing aggression, and posting extremist content online — behaviors that can signal potential radicalization.
To help schools identify and respond to such risks, 33 teachers, psychologists, and pedagogues from Gostivar, Štip, and Kumanovo took part in a workshop organized by the Center for Research and Policy Making (CRPM). Through real-life examples, simulations, and interactive exercises, participants learned how to recognize early indicators of radicalization, communicate sensitively with students, and build trust.
The training also covered referral mechanisms and reporting protocols for cases of violent or extremist behavior, as well as strategies for early intervention and prevention.
This activity is part of the “Guardian Shield” project, a strategic initiative supported by Hedayah and funded by the European Union, aimed at strengthening community resilience against radicalization and violent extremism in North Macedonia.
